中秋夜

一早與家人飲茶之後，就同高思雅去了街市買餸，家人話街市可能會早收，叫我早D去買餸。

之前已經諗定今晚會煮咩，但，都係烏龍百出！今晚有七餸一湯，所以要寫低一個buy list，點知，烏烏龍龍，出左門口才發現無帶個list，唯有，靠記憶去買材料啦！

去到街市，話要買大隻的蝦，居然，無端端買左細蝦，細隻好難開邊，唯有再買過一些大隻小小的。

去到另一檔海鮮檔，諗住買帶子，望完以為無得賣，海鮮檔阿叔見我企係到，便問：「小姐，買咩呀？」我答：「帶子。」，他指一指我眼前的貝殼類東西，答：「呢D就係。」原來，我係唔知道，帶子的殼原來係咁樣的，平時食開的帶子，只見到它的肉，本無為意它的殼，原來是這樣子的！

回到家，預備今晚的晚餐（上半場），開始煲湯，醃雞脾肉，帶子起肉，中蝦開邊，同埋，焗熟些腰果。朋友話她媽媽不用油炸，用焗爐焗，120C焗10分鐘，反轉再焗多10分鐘，因為我的焗爐無温度，所以，我就打算用430W焗10分鐘，點知，隔了3-4分鐘，已經聞到燶味，就立刻熄左佢，一睇，燶晒！

好燶的腰果，但好脆，最後成為垃圾桶的東西

我趕住出去做gym，算數，返黎再搞過！

回家，5點幾，又繼續預備今晚的晚餐（下半場），洗菜，將其他東西切粒，又再一次焗腰果，這時，我才發現我今早擺左個烏龍，原來，我今早焗腰果時，不是用了430W，而是860W，我將個扭制，180度調轉左方向去扭，應該向下的，我向左上面扭，唔怪得人地話要焗成20分鐘，我唔使5分鐘就濃晒！今次，就用左200W，每邊焗5分鐘，不過，就唔夠今朝嗰D脆！下次，要再試個W數同埋要焗幾耐，希望下次會脆D！

無濃到，但唔夠脆的腰果

我未起身，家人已經買了現成的白切雞和燒肉

今早煲好的青紅蘿蔔粟米豬骨湯

清蒸紅魚

蒜茸蒸蝦，開邊係好難，用刀根本切唔開隻蝦，唯有用較剪去剪，但，唔可以平放開邊，仍然有些曲曲地！

豉汁帶子蒸豆腐，可能蒸耐左，帶子有點靭！食譜話要用「豉油，雞粉和熟油」做個汁，我就有理無理，將三樣放晒一齊煮，搞到個煲黑左一塊，事後檢討，應該只煮油，然後倒入豉油雞粉入面，再將佢淋係帶子上面!

白灼生菜

西芹腰果雞丁

食飽之後，打開雪柜，我又發現，我居然唔記得放甘荀落去雞丁一齊炒，雖然有佢同無佢分別唔大，但，無帶個list無買漏野，但居然煮的時候，唔記得放齊材料落去炒，哈哈！

我好小去買餸，通常都是家人去買，最多就幫下手煮咁樣。我覺得自己買餸時，真係一舊雲，有時，根本連自己想買的東西係點樣都唔知，又或者唔肯定係點樣，都係問下檔主，我要咩咩咩，佢就秤D咩咩咩比我，又唔識格價，又唔知D野新唔新鮮，好似買得好求其，見到啱買的就買！

不過，今晚的七餸一湯，「輪輪盡盡」的情況下，同係高思雅的幫忙下，終於大功告成，下次，都係食四碟餸好了！

夜小小，便賞月，但其實都係一個儀式，吃小小水果，就過了一個「充實」的中秋節！