大除夕 - Happy New Year

今天是2006年的最後一天，沒有外出倒數，只是和家人在家裡開了一個小型大食會，買了些魚生，燒雞，ribs...等等，開了支red wine，在家中慶祝新一年的來臨！

願大家在新的一年，開開心心，身體健康，多D人工，少D workload，心想事成！

HAPPY NEW YEAR

維港夜景遊

今日同爸媽參加左個維港夜景一日遊，下午２點半出發，先去山頂，３點半到達，４：１５就走，然後５點就食晚飯，６：３０就到皇后碼頭上船，遊左一個鐘，便回程，返到屋企８點鐘。

其實我覺得好無聊下，大部份時間都係坐車，係山頂得個４５分鐘，逛了一陣又上車，不過算啦，當係陪下daddy/mummy 啦！

返黎啦！

終於完成左我的四日三夜上海之旅，雖然說上海好凍，只得幾度，最凍去到零度，但對我來說都沒有太大影响，因為我在外面的時間好少，不是在酒店，就是在公司，要不然就是在用餐的地方，況且室內又有暖氣，所以我可以感受到凍的時間好少。

因為和我一起去的FM，可能她已經去過上海N次，所以沒有興趣外出，況且她怕凍，所以唔想出去，我們在上海三晚，只有一晚逛了在酒店附近的南京路步行街，買了些東西，其餘的時間，我們都在圍繞公司附近，因為，我們住的酒店很近公司，步行數分鐘就到。

而我們住的酒店，原來跟我兩年多前去旅行住的酒店很近，所以我去到的時候，就覺得熟口熟面了

上海

終於執完行李... 明天早機...

Merry Christmas

Wishing all of you a Merry Christmas!!!

7仔X'mas版吊飾

Cute版飯盒

傷城

今日同個fd去左睇傷城，係我今年第一部入戲院睇的電影，如冇意外，也是今年最後一部！已經好少入戲院睇戲了，尤其是港產片！就筫去睇，都係睇西片多，我崇洋嗎?不是，係我覺得抵睇D！今次想寫的．．．唔係影評．．．
想睇呢套戲的原因好簡單，梁朝偉及金城武，再加上舒淇！我有D朋友／同事對舒淇的評價都係麻麻，佢地會問點解黎明會鍾意佢？覺得佢唔靚！但喺女星之中，我都幾欣賞佢，可能因為我第一部看她的戲，係佢同哥哥拍的飲食男女，又可能，因為佢曾經係黎明女朋友（雖然他倆都冇承認過），哈哈．．．
舒淇和樂基兒，其實我覺得黎明同舒淇襯D

篤背脊！？

尋日同FM傾左個幾兩個鐘，佢叫我入左佢房，頭半個鐘係傾下下星期去SH要做D咩，本來開住門，但傾完　SH的行程之後，就叫我關門，有其他野同我傾。原來佢想問我覺得新同事（上月返工嗰個）怎樣，因為除左FM自己之外，我係同他work得最多的一個，所以FM想知我對他的評價。

一開始我有點唔知點講好，有D似篤背脊的感覺，FM就話她已經同我地的director傾過，她對他的表現不太滿意，所以叫我照直講，如果佢pick up唔到，就可能要搵個另外一個人返黎幫手，如果他幫唔到手，就等如我一個人要做晒兩個人的野，我會overload！

我對他的評價是負面的！！！不過，我也兜了一兜，話因為他是senior，我對他的要求可能高左D，高過其他與我work的junior，點知，FM即講，應該係要高D，因為他唔係junior。有時我覺得，如果同一個錯發生係D junior到，我諗我會冇咁憫，但佢係senior，應該接收能力及分析能力都應該高一D。

但同一個問題，他問了一次，兩次，三次，我就會覺得，佢究竟明唔明我講咩，好多時候，我真係覺得佢理解唔到，但可能我已經有D”憫”，係佢未明的時候佢就放棄再問，做出來的野，簡直係令我有「想死」的感覺！我覺得review佢做的report，重慘過自己做！！！

佢問的問題，令我覺得佢好無sense，對一D我們呢行的用語，好似唔係好明，但佢話佢唔係fresh grad，即係．．．佢應該有工作經驗，唔會對自己個行呢D basic野都唔係好知！！！

佢話佢之前用過我們宜家用緊個system，但，我睇唔到佢識用lor，其實佢用黎用去都係個幾個function，但都唔明點解佢都搞唔清邊個打邊個！！？

佢黎左個幾兩個月，其實我都唔知佢係咩grading，只係知道一定唔係junior，尋日個FM比左個O-chart我睇才知，佢高grade個我，我個心有D唔順，佢職位高過我，人工又高過我，有咩理由要我教佢做野，重要review佢的work。教佢做野，就好似教D junior咁，最死的係，佢做出黎，同個junior做出黎的，一樣係錯漏百出，究竟，佢有冇睇過自己做完的野才交比人架．．．佢係senior，照理，都唔使搵人review啦．．．junior都仲可以話下．．．佢，我就唔敢話佢．．．

臨離開FM間房前，我再兜多一兜，話可能佢對公司重未熟悉，所以先至係咁既performance，跟住FM conclude左，FM覺得他的問題係無sense，呢樣野，FM話唔係時間可以解決．．．

今日．．．係我放工前，FM叫我比5分鐘時間佢．．．原來她同我講，她同個director今朝再傾左一次．．．結果就係．．．冇得留低．．．

 

 

做gym

差唔多兩個月無去過做gym，今日早少少收工，就走左去做gym了！九月底搬公司之後，距離gym room近左好多，未搬前諗住會多D時間去做，點知事實相反，去的次數繆繆可數，真嘥錢！

本來想過跳個跳舞course，去到先知暫停，要到出年一月才有返．．．

水果Kitty - Candy Toy

呢隻就係同事送的pinapple kitty，佢頂帽同件衫都可以除出黎的，如果有其他的款，就可以交換衫著。

呢個就係前排無聊行過時買的，諗住買藍色，點知打開係粉紅色，同盒面的顏色都唔同！

無事出街少破財

今日放工後，打算去買禮物，係harbour city及LCX行左一個鐘，禮物就買唔到，反而買左D野比自己，真係一出街就使錢．．．唉！

星期五要送比人，聽日一定要買到．．．

聖誕禮物

今日我收到今個聖誕的第二份禮物，係一個同事送的，是隻可以換衫的水果kitty，它有一系列五款，她送左pineapple那款給我，我就放係公司枱頭

今天原本可以在７點走，因為我係７點交完我要交的report，點知，咩叫做「執輸行頭」，今日就體會到，本來個FM叫左新同事做個report，７點佢都未做完，原本打算走，留返比個FM去review佢做的report，點知，我正想準備執野走之前，個FM話她要走，叫我review完佢的report，今晚要send埋出去，唉，我早５分鐘搞掂自己個report走左咪唔使review人地嗰個lor，５分鐘．．．真係可以改變好多野．．．

有時我都幾唔明，呢間公司的呢個report，我都未做過，叫一個未做過的人去review另一個第一次做的人的report，結果係，咪要打電話求救，搞唔掂，求其砌住個數，交左出去先，聽日等佢再review。最後搞到９點幾先至可以走得

平日大食D?

今日去左個friend到做野，唔知點解，係佢公司做野的時候，成日都唔覺得肚餓，早餐只係食左麥皮，一直到夜晚約左朋友食飯才再食野，但我平時係公司，就算有食午餐，下晝就好快覺得肚餓，要摷野食．．．真奇怪．．．唔通平日的食量會大D？

第二課

隔了一個星期，今天去上第二堂，今次教的，比上堂的深一點，雖然我都係之前學過，但都有一D之前未學過的，冇咁悶！但期待阿Sir會教D深D的，因為個course都唔平，唔好交行貨比我不過下堂上唔到，希望下堂沒好教我唔識的野。

落堂行去坐地鐵時，覺得有點凍到入心的感覺，可能因為落住雨，而我又冇帶遮，所以就急急腳咁行，一心要以最快的速度去到地鐵站，才有點溫暖感覺

工作效率

開始要研究下，究竟我的工作效率係咪降低左好多，點解每晚都要OT之餘，重係未做晒D野，有咩好的解決方法呢？長此下去，我會冇晒人生樂趣！

紫羅蘭

前兩日買左個花盆，今日帶左返公司，將公司盆垂死的紫羅蘭換到新的花盆到，希望佢可以重生！？舊有的玻璃花盆，諗左放D水係度，等附近環境可以保持濕潤一D，點知，原來呢個玻璃花盆係裂左，之前放住紫羅蘭就唔覺，但只係放水就出事，漏水，搞到連部laptop都濕埋，幾驚燒左部機就大鑊！拿拿臨整返乾佢，希望D水唔好走左入部機的裡面．．．我D files大部份都冇backup，死左就慘lah...

放假！

今日放假，本來打算去做gym，但真的好懶，唔想出去，只係喺屋企附近逛了一陣。呢排逛街，見到好多好得意的公仔，真的好想買返屋企，但，轉頭一諗到屋企又唔可以display佢地出黎，買左返黎又係塞落柜桶，不見天日，都係放棄買佢地返屋企的念頭，費事嘥錢啦！

明天又要返工，點解咁快又放完假呀！

睡魔急CALL！

雖然唔係病，但呢兩日都有點「溫溫鄧鄧」，除左瞓覺，做咩都好以提唔起勁，好想快D都聖誕，過返個長weekend！唔係食就瞓唔想郁！

聖誕禮物

今日冇去返工，因為太攰了，想休息一下！同屋企人去完飲早茶之後，就一個人去買禮物，仲未買齊，睇下晏D出去食飯前再逛下！

捱完一個星期！

今個月返左六日工，有５日做到十點十一點，真的有點過份！呢一兩日見到網友在講加薪的問題，我有感而發，我公司真係「加辛」比我，不過，係辛苦的辛，唔係薪金的薪！

其實我覺得宜家係個惡性循環，加左幾日班之後，日頭的工作效率就減低，到放工時間就又做唔晒，又要OT，又做到好夜，第二日精神不夠，又減低工作效率，．．．，循環不斷，愈做愈夜，愈來愈辛苦．．．

呢佪唔係我想要的生活模式呀！

上海

今天收到消息，要Boxing Day去上海，FM問我想29號夜晚定30號飛返黎香港，我梗係話29號啦，蝕左boxing day一日比佢，唔通仲要蝕埋個Sat咩！上去SH搞上面的system migration，主要係教佢地用SAP，但，講真個句，我都係半桶水，國語又唔掂，到時比人問到口啞啞點算？

我foresee到呢個月都唔會有好日子過．．．唉！

對像!?

尋晚放工返到屋企無耐，就收到朋友的電話，問我關於上星期六gathering有咩新update？食飯吹吹水，我都唔知會有咩可以update到佢，又唔係真係好耐冇見，而且又閒來通下電話，都唔會有咩勁爆消息．．．

佢話有個盤推介下，問我甩頭髮及肥我接受唔接受，跟住我就同佢講，我好膚淺咋，我睇外表架，呢兩樣野都好影響外表，都係唔會好接受到架lah...　佢話另一個係警察，預科程度，問我介唔介意，我話我驚溝涌唔到wor...

請問有冇D筍D的盤呀?不過，筍盤又未必輪到我．．．．

無望！

以現在的工作進度黎睇，今晚唔想OT都唔得！

艱苦的第二天

今晚十點半先走，本來冇打算咁夜走，係因為有個同事仲有好多voucher未入，但又唔想一個人留係公司，咪搵我倍她囉，如果佢入唔晒D野，我咪一樣唔可以埋到數，就應承陪佢，一邊做，一邊等佢，不過，其實走的時候我都仲有好多野未做，不過，要做晒先走，十二點都唔使指意走到，target十點半走，唔理做晒未都照收工，聽日繼續！

咁樣OT法的源頭，我諗應該有三個主因：１．SAP太複雜，比舊system用多好多時間去做同一樣的工作，還有，好多report都未ready，全部都要用人手在excel砌！個system powerful到咩report都冇，唉！２．以前我做三間公司的野，宜家要做第四間，但又冇人pickup我先前個三間的工作，做三間的時候，時間都唔係好夠用，做埋第四間，唔勁OT都根本冇時間可以spare出黎做！３．有個新同事上個月返工，唔知個Manager冇教佢做野，定係Mgr叫佢黎問我，經常要解答佢的問題同教佢做report，都嘥我唔少時間，但唔教又唔得，佢唔識做咪又係要我做，所以宜家要”投資”D時間去話比佢聽點做，佢早D pickup到，我就唔使OT到隻野咁，真希望佢可以快快學識，我就可以（希望）快快甩難！

OT後遺症．．．我又開始爛面啦．．．好返都唔夠一個禮拜．．．天呀！點解要咁對我，我唔要爛面呀．．．．．．

 

OT的生活又開始了！？

尋晚又OT到11pm，唔想咁樣，可以點樣？

７仔Hello Kitty

今日晏晝去左７仔買雜誌，今期講曼谷，希望出年可以去到泰國，兩年冇同屋企日去旅行，同家姐傾過，希望出年去泰國。

我特登去左遠D的７仔，因為之前去來去去都係同一間，大部份kitty都係重複，所以唔去嗰間，唔知同一間係咪得幾款，行遠D，真係有D唔唔同，今次有兩個，兩個我都冇的

Shopping

今早與家人去完飲茶之後，便與家姐去左CWB，因為要去取眼鏡。有個係眼鏡廠做野的朋友送左副０７年的框比我，所以咪去配副鏡片，今日有得攞，呢款係我平時唔會買的款，橙色框，好sharp的顏色，今日著左件紅色外套，好襯！

逛左成個下晏，都冇收穫，臨返屋企前去左捐血，好搞笶，捐血送杯麵

不過，坐小巴返屋企時開始肚痛，同家姐講笑咁講，唔知係咪飲完杯美綠就有事，不過今日食過咁多野，尋晚又打邊爐，都唔知係邊樣野出事．．．

打邊爐

今晚約左班舊同學去稻香打邊爐，book左枱七點，但都要等到七點半先至有位，佢的擺位好迫，好容易撞到隔離枱的櫈，不過都唔算貴，我地叫左象拔蚌及兩個美國桶蠔，七個人每人都係$160，都okay架！本來今晚應該有八個人，其中一個在我前兩日confirm時間地點時才告訴我唔得閑黎，所以由八變七。

其中一個朋友送我們Godiva的朱古力，真的非常多謝，但我沒有預備任何禮物回禮，下次gathering時會買返比她

打完邊爐後便分道揚鑣，我們三個女仔去左食糖水，滋潤下，因為打邊爐好燥，食完才回家，可能夜的關係，車程大約半個鐘頭便回到家，比平時放工快好多!

 

上course

報左個course，終於今日開始上課，隔了幾個月冇上堂，今日又開始讀書的生活，不過，今次學的沒有咁大壓力，都係學下Excel，不過，今晚教的好簡單，所以都幾悶下，希望下堂那些深少少，不用咁悶。