落雨的日子

近排成日落雨，搞到無咩心機出街，今日本來約左朋友bbq，但因為時不時落陣大雨，搞到要cancel，好無癮！

本來bbq後打羽毛球，但bbq cancel之後，就只剩返打羽毛球，打完波就同朋友去食壽司，五個人食左三十一碟，前排見到blog友話佢三個人食左廿幾碟，我地就好似差左少少，哈哈哈！

因為即場決定去食，所以沒有帶嗰張credit card，無左85折，但好在朋友有佢張member card，都有返9折，無咁蝕！

 

八號風球的一天

前晚十點幾八號波，咁早掛，諗住尋日無假放，所以如常起身返工，起身第一件事當然立刻睇下電視，見到八號波，梗係立即繼續瞓覺啦！

十點幾，天文台話會係中午前改掛三號，咁就同屋企人先去飲茶，之後才返工！

剛剛好兩個鐘內返到公司，無遲到，哈哈！之前有同事試過未能在兩個鐘內返到公司被count遲到，好唔抵，因為天雨路滑，交通梗係會塞D架啦，咁都唔consider下！

不過呢，有點黑仔，返工公司，我的眼鏡居然「壯士斷臂」，好彩已經返到自己位，搵下搵下，終於比我係地毯到搵得返粒螺絲仔，便拿拿臨拎去眼鏡鋪，叫人幫我整返，唔係的話，成個下晏都要係眼朦朦的情況下工作就慘了！

因為半日的關係，好快就可以放工，好relax的一天！

 

無野之城

昨天去了看「無野之城」,是朋友有 coupon，搵我一齊去睇，只知是一套講棒球的電影，但同我expect的有些距離，我以為是一些勵志的運動電影，但實際是男性胴體過多，描述棒球太少！棒球，好像變成了小小的點綴，不是電影的「主角」！

唯一這套戲令我知道的是，原來香港是有棒球隊的！

 

 

陳慧琳演唱會

上星期六晚上去了睇Kelly Concert, 8:30pm開show，四面台，好似是紅館裝修前最後一個concert！上半場，多是近年的歌，唔係好識，到下半場，是一些舊歌，亦是一些我比較熟悉的歌曲！我不是kelly的粉絲，對呢個concert沒有什麼期望，可能我比較攰，加上唔熟D歌，而且Kelly超過大部份時間只對住佢D粉絲（即一小撮歌迷）唱，好似整個concert唱比佢地聽咁，所以我並不是太投入，唯獨覺得Kelly的衣飾好靚！11:15pm前左右完場，沒有其他表演嘉賓！

詹瑞文 － 萬世歌王

係上星期二，與朋友去了文化中心睇左呢個show，第一次睇詹瑞文的演出，有些期望！

節目係7:30pm開始，那天又滂沱大雨，只可以係老麥吃了點東西，便怱怱趕去文化中文睇show，但都要等到7:45pm才正式表演！

上半部份，是他扮演不同的歌星，參加歌唱比賽，非常搞笑，從中嘲諷一番！

半場休息（好似係度睇緊opera咁，居然有半場休息，哈哈）

下半部份，他在傳遞一些「訊息」，沒前半部那麼搞笑，亦較為嚴肅！

他，居然可以一人分飾數角（唔知會唔會有精神分裂架呢？！）

一字講晒：「勁」！