牛年 - 新年快樂

祝大家新年快樂，身體健康，青春常駐，搵多D錢

赤壁－決戰天下

終於等到赤壁II上畫，之前睇完覺得睇完赤壁有點比”昆”的感覺，原因係，我未睇前唔知佢有兩集，睇到就黎真的做火燒連環船的時候，居然完結！

朋友有coupon，約了昨天去看，地點時Elements，我第一次去Elements，問了朋友由尖沙咀可以坐咩巴士去，去到，未夠鐘，就周圍逛下，行了一陣，朋友打比我話先去攞飛，然後再搵我，我就繼續行下，其實都唔係行到好多地方！

係夏麵館吃飯，我叫了個水煮牛肉麵，待應話好辣架喎，我答唔緊要，不過我都叫了杯凍豆醬，以備太辣時飲！

黎到之後，我就開始食，點知，我一點辣味都feel唔到，個待應話好辣架，但我覺得連一點辣味都沒有，真失望，如果早知佢的好辣只係咁樣，我連杯凍飲都慳返，飲返杯熱野算啦！

食飽飽之後，就去睇戲，有一個朋友話比我聽套戲一般，另一個朋友話比我聽好睇，一個非正式的統計，都應該okay！

打仗的場面，我都係鍾意第一集的八卦陣多一點，但講特技，當然呢集的火燒連環船黎得澎湃一點！

剛入場的時間，因為太攰，好想瞓，好在套戲都唔悶，否則我怕我會係戲院瞓著左

 

Buffet @ Harbourside

朋友係27號生日，我們預早在23號為她慶祝，上次黎Harbourside是high tea，今次是第一次黎食buffet，book枱時已經講明無生蠔，有一點失望！

一黎到，當然急不及待舉機影下外面的view啦！

雖然沒有生蠔，其他的海鮮非常好味，我鍾意個龍蝦

龍蝦當然要再食，魚生都yummy yummy，個甜蝦都好好味架

食完生冷野，食返少少熱葷，有燒牛肉，但好肥，有北京填鴨，天婦羅等等．．．

估下呢碗係咩?

凳凳凳凳．．．　係魚翅．．．好足料．．．

當然我食buffet必食的甜品啦

甜品食完，就食點生果及雪糕

因為buffet已經好飽，所以，沒有特別買生日蛋糕，就係buffet table預備了呢件cut cake作為朋友的生日蛋糕

黎埋個餐飲，這晚的buffet又食到好滿足咁離開

這裡無論食物和環境都好，但唯一不足的就係D Staff，我好似同佢地溝通唔到咁，每次不是要我講幾次，就是他們講得太快我聽不清楚，好似都要repeat才能溝通到，呢個我覺得要改善下!!!

 

年廿八洗邋遢

年廿八，開始放新年假，年廿八，本應係洗邋遢的日子，而我，就選擇去了整頭髮，希望新的一年，一個新的形象，去迎接牛年的來臨！

想轉髮型都好一段時間，但礙於怕要打理麻煩，所以，諗左兩三個月都沒有赴諸實行，但，今天終於的起心肝，一早走了去髮型屋，轉轉新形象

我十點半入到去，不用等，就可以洗頭，髮型師問我常點整，我話我想電髮，他問我幾耐無電過，我話有兩三年了，其實，今天係我人生中第二次電，因為我覺得curl hair打理起黎好麻煩，所以都唔係好想試，上次試了第一次，效果麻麻，所以，又事隔多時才試第二次！

佢先幫我剪頭髮，問我想剪幾多，因我怕曲左會縮左上去，所以只係修一修就算，剪完就又另一個staff幫我鬈髮，她先將我的頭髮分成一小撮，然後將它穿過兩塊好似白方飽的隔熱塾，塗上電髮油，鬈在髮鬈上，如是者將所有頭髮都鬈好，跟著推了部機過黎，好似有好多電線咁，逐條插在每個髮鬈上，有點好似matrix入面，奇洛里維斯在傳送data入佢個腦到時咁樣

開機後，我就開始feel到熱力，然後越來越熱，熱到我有點頭痛，最後，我同個staff講，好熱好痛，佢就再將D方飽隔在我的頭髮與頭皮中間，又好像較細左部機，無咁熱！

熱完之後，佢將所有電線都拆了之後，再塗了一些東西上去，又呆坐左一陣，終於可以去洗頭了，髮型師幫我再剪一剪，修一修，佢話，都唔係坐左好耐啫，做咩呆晒，唔係好耐，都兩個幾鐘，又眼瞓，想唔呆都唔得啦！

佢幫我吹埋個頭，就成功幫我又直髮變為鬈髮，我覺得今次電得都唔錯，雖然電到頭痛！不過，我唔知會唔會最後怕煩，走去做返負離子，整返直佢呢

今天才發現，原來我的頭髮都不短，鬈了之後，原來都唔係縮左好多，都仲okay夠長

 

 

 

 

歲晚收爐

今天係農曆年前最後一個工作天，絕對係holiday mood，又或者，經過減double pay及要放no pay leave兩個大的壞消息後，大家，根本就沒有working mood，士氣低落，還是快快放個新年假，將所有怨氣都化晒，才可以平伏心情繼續工作！

2月開始，每天的返工人數都會少左，原本11人的dept，有些日子，只得六個人返工，返工的人，要做埋放假的人的野！而有notebook的人，下左旨，要帶notebook返屋企，隨時standby係屋企開工，仲要講明電話要搵到你，究竟，咁樣其實根本就唔係放假，只不過係home office，只係唔使今搭車返公司，打卡，係屋企做啫！

以前好想放長假，但咁樣的長假，真係唔多想lor

失魂的一天

今天如常一邊聽歌，一邊睇報紙，一邊坐地鐵返工，突然聽到「嘟嘟聲」，抬頭一看，見到車門正在關上，我當然沒有勇氣衝出去，唯有坐到去金鐘，去另一個月台，坐返轉頭，係月台見到個同事，佢都驚訝點解會係金鐘見到我，哈哈！

好在我每天都早十五分鐘返到公司，雖然今次坐過龍，但都無遲到

***

hod終於出左個leave plan了，我要求改變放假的日期，hod問我點解，問我係咪去旅行，我都好想，但有假無錢（悲哀），去mug鬼旅行呀！當然我比了個好合適的理由佢，況且，我預先亦有同個manager講，係manager同意的情況下，我先同hod講，不過，佢話要hr批！唯有等待結果lah！

已經被迫放假，唔好連幾時放的選擇權都唔比我地啦！

 

 

NO PAY LEAVE

上星期五收到HR的email，今天早上9:30am要開staff meeting，由COO及Senior VP主理，我係呢間公司幾年，都未試過開staff meeting，心知唔方會係好野啦，只係唔知道，究竟會衰到點樣

COO發言加Senior VP補充，大致上係講外圍環境好差，又有金融海嘯，公司08年的業績好差，管理層喺考慮過裁員，減薪的情況下，最終決定每位員工要係二至六月，放30日無薪假期！即，呢5個月入面，每個月都係8折出糧！全年去計，減左差唔多10%人工！

08年，已經由十三個月糧變為十二個半月（如果有嗰半個月的話），09年，就由十三個月變為十一個月（我諗個double pay都兇多吉少），最慘上半年放左，唔等如下半年唔使，下半年又唔知會唔會有D新的措施，繼續要減省成本．．．

08/09，真的係多事之秋！！！！！

 

我們的醫療制度

對於明愛事件，得出一個教訓，就是，無論係咩地方，需要求救，記住一定要打三條9（到時唔好話濫用三條9囉）！

對於另一件的事件，我得到另一個領會，就係，病情無進展，就唔好係醫院阻住張病床！

呢個，就係我們的醫療制度

．．．．．．

黃醫生：「你們有什麼打算？」

A：「出院後，打算送她到日間護理中心，夜晚就返屋企，我們已經要求醫務社工申請緊了。」

黃醫生：「你們知道呢D 的日間護理中心，要排期兩三個月，但醫院的床位好緊張，不可以等兩三個月，呢段期間不如入住老人院先啦！」

B：「都係政府的嗎？」

黃醫生：「係，係政府的。」

B：「又申請日間護理中心，又申請老人院，會唔會有duplication架？我好似聽過話唔可重覆申請。」

黃醫生：「應該唔算係duplication，不過可以幫你同社工check 返。」

黃醫生：「咁即你地同意先入住老人院，再去日間護理中心。」

．．．．．．

黃醫生：「你地仲有咩問題？」

C：「她的情況怎樣？」

黃醫生：「她沒有什麼進展了，就算再做物理治療，都唔會再有進展，你知啦，醫院的病床緊張，如果有進展的，可以住耐D。」（咁即係有得醫就可以住醫院，無得醫就放棄，要被趕出醫院，唔好浪費政府resources?）

．．．．．．

係QE的時候，三翻四次要求見醫生，每次醫生都係用電話回覆，話，就算見面，都係講返電話中的同一翻說話，所以無需見面！希望見醫生，不是想煩她，只是，好想多一點了解病情，幫助到病人！直到離開QE去KH的時候，都係沒見過醫生一次！

反而在KH，醫生主動要求見面，第一次見面，是12月17日，與潘醫生見面，她說，病人兩個星期後可以出院。當時好驚訝，病人連自行飲食都不能，仍靠胃喉輸送營養液給她，坐又未坐到，她怎可能出院？所以，對這件事亦沒有多加理會！

今個月，無論姑娘，治療師，醫生經過時，都追問打算怎樣，於是找社工申請日間護理中心，一個月後的1月17日，第二次見醫生，都係醫生主動約見，就是以上的對話（次序可能有點混亂）

原來醫生見家屬，唔係想讓家屬了解病人的進展，她們會怎樣醫她，幫她，協助她，兩次的見面，都係帶出一個目的，「你們好出院啦，唔好阻住張病床」，無論病人是否合適出院！（當然，係佢地的「專業」角度，緊係覺得合適啦，但以普通人的common sense去諗，根本就無可能出院囉！）當然，家屬都好想病人健健康康咁出院啦！

另一個結論就是，有進展的就可以留長些係醫院，進展慢些的，就會同你講病人無進展，可以出院了！（一個月前連自行飲食都唔得，到現在可以坐得稳，呢個，原來都唔算係一個進展黎架？要由趟係張床到可以行得走得，行動自如，呢D先叫做進展？），同埋，無「進展」的，連物理治療都慳返，做黎都無用，但common sense話，如果肌肉長期不動，會委縮，就算不能動，亦都要做物理治療／運動，令肌肉唔會咁容易退化！但又原來，醫生係覺得唔可能行得返的人，係唔使做物理治療架！？

我對我們的醫療制度，不禁，起了懷疑，原來妙手仁心入面的內容，係現實生活中係沒有的，醫生和其他的醫護人員，只會覺得佢地醫唔好的病人，只係阻左其他人！！！

政府的宣傳，與市民遇到的，根本，就是兩碼子的事！！！！！！

 

繼續迎新!

今天同姐姐講起個電飯煲，話佢雖然未壞，但煲底已經開始甩，再用，會唔會慢性中毒，佢地都同意，於是我們就決定，買過個新！

套用姐姐的屬語，買個正宗的電飯煲，究竟咩叫「正宗」，就係，只需要煮到飯同保溫都可以了，其他的功能，一律唔要

去舊迎新?迎新迎舊!

星期三新的洗衣機終於送到屋企，終於可以洗衫了，唔使堆住一大堆污糟衫，yeah!

朋友知道我部mp3 totally dead，就託人星期三夜晚，交部iTouch比我用住先，我專登坐車過海，去到hotel concierge，個staff話個guest無留低任何東西給我，我唯有打電話問朋友，佢再打給佢的aunt問，之後我再打電話給朋友，答案係，佢aunt以為留低了係concierge後，contact我後，才叫我去拎，但我朋友話佢係叫佢aunt係check in嗰日就交低，朋友say 晒sorry，但，我都知唔關佢事，亦都無打脾氣鬧佢，但始終有D憫lor，突登去到但咩都拎唔到！

當晚朋友的aunt call我，話第二朝早就交低係concierge，我話我要星期五晚才得閑去拎，去到之後，個staff都認得我，問我尋晚係咪個guest無留低份件比我，我話應該係前晚，個staff就入去幫我搵下，好彩，今次終於有了，唔使再白行一趟！

去舊，去了部壞的洗衣機及壞的mp3機！迎新，迎了部新的洗衣機！迎舊，迎了部二手的iTouch返黎，雖然話係二手，但都好新下多謝晒

期待，部手機維修後，可以安然咁返黎我的身邊，雖然有朋友叫我趁佢仲有二手價時賣左佢，買過另一部新手機，但，我始終係N記的粉絲，但N記的近來的新手機，唔係太貴我就嫌佢唔夠靚仔，所以，都無咩邊款可以揀！其他牌子，覺得佢地夠靚仔的就覺得佢地太貴，又嫌佢地無咩二手價，所以，我下一部手機會係咩牌子同咩款，我都未揀啱，係我搵啱新歡之前，我都係決定用返宜家部手機，希望，佢整好後可以正正常常啦朋友麻煩晒你啦，麻煩班師傅打救下我部手機，唔該晒

 

 

 

一場虛驚

今天臨放工時，準備交report，寫好個email，諗住attach個file上去，點知，我搵唔個file，我搵左好多個folder都搵唔返剛做完個file，心諗，唔係呀麻，我無save到咁大獲？做左兩個鐘的野付諸流水？

 MIS放左工，但都call佢手機問下有無得救，試左幾個方法都係搵唔到，於是，我用最後一個方法，就係成部電腦search，去完個廁所返黎，終於search返到個file出黎，唔知自己save左去邊，但搵得返，都算係好彩，唔係的話，明天要重新黎過！　

就係咁，虛驚一場，嘥左成半個鐘係到搵file

去舊迎新!!!?

踏入2009年，希望新的一年有新的開始（好行tim），嘻嘻

一月二日，一早發現mp3壞左，心諗，咁黑，係咪hang左咋，但最後結果係，無得整，certified！

同樣係一月二日，黃昏時打電話比朋友，我聽到佢講野，佢聽唔到我講野，如是者來回幾個通話都係咁，唯有關機開機再黎過，搞咩呀，連部手機都有小毛病

一月八日，「洗衣機停轉日」，屋企的洗衣機，終於捱唔到過農曆年，壽終正寢！

一月十一日，終於買左部新的洗衣機，最慘的唔係要買過部新，而係屋企kitchen好細，要搬部洗衣機出黎，要先搬走部雪柜，才可以有足夠的位置移動部洗衣機，位置太窄，拖又拖唔到，拉又拉唔到，搞左個幾兩個鐘，最後合四個人之力，將整個雪柜抬起後才可以搬到出飯廳，等星期三送貨！這只是苦力的上半場，還有下半場，就要等收到洗衣機後，又要將整個雪柜搬返入kitchen，唉！！！

當朋友知道我的mp3及手機都有事的時候，大家都咁講：「舊的唔去新的唔黎」，買過部新囉！

WOW，08年12月公司已經唔出double pay，要推到一月才出，仲要話明最多只係得半個月（即，好可能會少個半個月），亦都唔係個個同事都都有（話要subject to good or outstanding performance喎），究竟自己有定無，都係未知之數，邊敢亂咁使錢買mp3同手機呀！

祝自己好運啦，希望都會有呢個所謂的double pay啦！！！