尋日下午瞓左晏覺，所以，晚上都不能立刻入睡，到睡了不久，聽到"砰"一聲，立刻衝了出去，開了燈，見到她跌親，他正在扶她起身，我便立刻幫手扶她，姐姐也醒來幫手！
問她有無事，有無跌親，她堅決話無，係咁叫我們去睡，但，我們不敢立即去睡，就算她說無，我地都唔覺得會完全無事，在姐姐"揭"而不捨咁問她，才她說撞親背脊，不過應該無傷筋骨，幫她搽了些跌打酒後，我們才去睡！
又睡了不久，他叫醒我，說他要出去買報紙，叫我陪下她，以防她再次自己行，再跌親，我就半醒咁陪著她，直到他回來我才去睡！
早上醒來之後，就不段同她說，你唔想我們担心，唔係唔比我地知你行，自己一個人偷偷行，反而會讓我們担心，如果，你可以在需要我們的時候叫我們，而不叫我們的時候，就不會亂黎，自己摸黑周圍行，或去嘗試洗衫，我諗，我地會無咁担心！
希望，她得到今次教訓之後，會做個乖的老人家，唔好亂咁黎啦！
今早他叫我起來，叫我早D起身睇住她，我就立即起來，見她在床上，我便去梳洗，之後，她出來梳洗時，我就全程陪住她，但當她從廁所想出黎的時候，她又脚軟軟咁，對脚係廁所入面，但個身就"中"左出廳到，喝住她要提脚行路，但，她這幾天都只懂用個身黎行，即係，身向前傾，但對脚唔郁，真的好驚她會PK！
好辛苦先扶到她回梳化坐，她根本就唔係行，係"中"住出去！我幫她量體温，三十八點幾度，我便給她吃退燒葯，此時，他開聲講：「尋晚都應該比退燒葯佢食，要食清底」，我回答：「她五點幾食過，要隔四個鐘先可以再食，佢瞓前都未夠四個鐘」，他說：「尋晚她起身去廁所後可以比佢食」，我說，「我瞓緊覺，我點知佢半夜去廁所」，他說：「照顧佢，唔可以顧住瞓」，我立即好憫咁講，「我點唔關心佢呀，我知姐姐當時未瞓，已經陪她去廁所，你做咩唔叫姐姐比葯她食」，他說：「我唔係話你唔關心，但你地溝通好D」，我說：「講得好清楚，已經講左5點幾食過葯，要隔四個鐘先可以再食」！
我已經好憫，姐姐起身之後，我便換衫返工，黑口黑面咁出門口！
其實，我嬲的係，如果你覺得她要食葯，你咪尋晚叫醒我，叫我比葯她食，我一定無異意，你無叫我，我唔知她夜晚會唔會去廁所，唔通要我成晚唔瞓等佢起身去廁所時拎葯比他食？
再者，姐姐未瞓，全程陪住她，點解唔直接叫姐姐比葯她吃，嗰個都係你的女，你都唔敢叫佢做？唔通每次都同我講，再由我同姐姐講，有D咩唔可以直接同佢講架咩？
你無叫我醒我，又有一個姐姐陪住她，做咩"話"我尋晚唔比葯她食，姐姐都識拎葯架，佢就算唔識，都會叫醒我去拎，無叫過我，就唔好expect我係她有人陪的時候，我仲要standby唔瞓囉！
唔通，我們每人都要24小時standby！我覺得，只需要一至兩個人陪住她就okay，無理由樣樣野都要四個人去陪她！！！
尋日朝早，我爸提早叫醒左我，話他要出去買報紙及早餐，因她曾經跌親，叫我早D起身睇住她，所以，我便起來！其實她已經返回床上瞓覺，而我，就梳洗之餘，好留心聽下她有沒有起床，待爸爸回來，她才起來吃早餐，我就返工了！
她今天是要返中心做物理治療，我出門口前都唔知她肯唔肯去，直到九點幾，姐姐打比我，我才肯定她有去，都好，佢自願出門口，唔係被迫出去，都未至於完全放棄自己！我打去中心，提醒姑娘，她退步了，怕她會企/行唔隠，叫他們多加留意她！
隔了不久，中心打電話給我，說她發燒，三十八點幾度，要我揾人接她走，我叫他們先給她退燒葯，姐姐中午會去接她！晚上回家，姐姐說她回到家已經無燒，五點幾時就三十七點幾度，再食多一次，夜晚臨瞓前再同她量，已經無燒！
我早上分別打比姐姐，我提意請外傭，原因係，她情況不太理想，想請個人返黎幫手照顧她！
她每星期一三五去中心做物理治療，而二四就會留在家！所以，我通常會在二四放no pay leave，但我的no pay leave，放埋六月就完，就算用埋annual leave，都只可以放多一兩個月，到時，只剩爸爸對住她，我覺得，會對他做成壓力（因為我都感到壓力），一來對著的時間越長，磨擦會越多，況且，他也年紀大，她又企/行唔隠，他未必能好好的扶到她，所以，請個人，一來可以幫忙照顧她，也可以做下家務，不用他每天出去買餸煮飯咁辛苦！
其中一個姐姐話，佢一早都話請，但，當時無人action去揾資料，而我咁啱又要放no pay leave，當時大家，希望我放完五個月no pay leave，其間可以有時間照顧她，而她會在呢幾個月會有進步，到時，如果可以能靠四脚叉自己行得隠，已經可以減輕到我們的心理壓力，因為，我們最怕的，就是她會跌倒！
原本以為，我們距離目標近了一些，因為她可以在公園兜圈行一至二個圈，行得也不錯，但最近一次入院後，她的情況，就好似返回她2月時由KH出院的時候的情況！感覺係，我們又要從新黎過！真的有些氣餒！
雖然，我們都唔知，會唔會請到個好的外傭！呢個係「撞彩」，遇到好的就好，遇到唔好的，就真係會好麻煩，但，控制唔到，唯有，問下朋友，佢地係點搵，有咩要留意...等等！
從來都唔知，原來請外傭，係有入息規限的，入息少個某個數係唔可以請的，而且，住公屋的，要事先向房署申請，又要傭工係他們的國家有証明，在香港領使館申請，之後，才可以將完整的文件交去入境處，整個過程，都要八至十二個星期，我諗，宜家開始搵，到我放埋六月的no pay，同埋餘下的annual leave，希望到時外傭趕得切黎，就可以唔使爸爸一個人照顧她！
究竟係我們當時太過短視，無請定先，還是，我們一廂情願地相信，她會有進步，可以有基本的能力，可以行/企，自己照顧到自己!
尋晚家裏發生了小「爭吵」，其實都唔算係「爭吵」，但，氣氛好差！
事原係她自從星期六出院到尋晚，兩日幾，她都無離開過屋企，只係屋企瞌眼瞓，又唔肯郁，所以，連爸爸都唔敢出門口去買餸，本來打算一家人出外吃晚飯，但，無論誰叫她，她都唔肯出外！
對於同一件事，唔同人有唔同處理手法，面對她唔肯出外，姐姐A就答應她，說叫外賣回來，一齊在家吃，而姐姐B就極力叫她出外一齊吃，全程坐車，不用她行，但她，就是不肯出去！
最後，姐姐B堅決不吃外賣，自己一個人走了出去吃飯（面黑黑咁）！
而我，唔知係咪叫做「諗通」左，還是係到「逃避」緊，我不作任何意見，因為，越著緊，自己會越唔開心，所以，她自己選擇了放棄的話，我唔會再為她著緊，她想點，就由她吧！
每次姐姐在家，我都會盡量減少和她接觸，因為我的情緒，極容易被她的情緒索引，所以，為了減少對她發脾四，我就會順從她意思，肯出去就出去，唔肯出去就算！她想怎樣就怎樣啦！唔再強求什麼！
零晨兩點幾，突然比雨聲「嚇」醒左，「平生不作虧心事，夜半搞門也不驚」，但，自問，都無做過咩「虧心事」，但偏偏被雨聲「嚇」醒，發覺自己，躺在床上，個心「離一離」咁，而且，又像沒有睡過一樣，無意間，都好像留心房外的聲音！或者，我並不能真的「諗通」？
胡思亂想，諗埋好多「無謂野」！
家人的關係，其實好疏離，就算我們之間，無什麼「爭吵」，但，無「爭吵」唔代表和睦！
諗起十幾歲時，曾經有人問過我，我想活到幾多歲？我記得當時的回答是四至五十歲，當時覺得，人一生，用廿幾年來讀書，用廿幾年來工作，什麼也足夠，不用活到長命百歲！而家，我都係仍然覺得，人生，不用那麼長！
又諗起去挪亞方舟時參與左一個叫「最後三十秒」的活動，在入去之前，工作人員先叫我們填寫五年內的願望，入去之後，就假設地球發生大災難，要坐太空船離開，但，我地的太空船遇到氣流還是什麼，只餘下三十秒就爆炸，要我們在同一張紙上寫下遺言，當時，我只寫了兩個字，就係「再見」！究竟當時因為是假設的關係，還是我真的無什麼留戀？
人生，會經歷「生，老，病，死」，但我，希望自己只有兩個階段，就係「生，死」，我面對唔到自己「老」，自己「病」！
「哥哥」選擇了那條路，會唔會係，他，面對唔到自已「老」和「病」，所以，在最多人愛他的時候，選擇了離開！
胡思亂想中，又再睡著！
醒來已經九點幾，她去了醫院做物理治療，今天係last day，所以，我同她講，你今早無唔舒服就去啦，唔想去，就今早司機通知時間時才話佢聽唔去！起來時見她不在家，開心她終於肯出下去，唔好成日「le」係屋企！
一點到她就回來，我們先去吃lunch，免得她返左屋企後又唔肯出外，問她去唔去針灸，她說唔去，我就cancel左個booking，在商場推她周圍行，我專登推得好慢好慢，我唔想佢咁快返屋企，因為，我知，我無能力叫她再出過去，在家，她只會瞌眼瞓，在出面，起碼，都會打開眼睛望下野！
希望今天她瞓少左，夜晚唔會眼光光，坐天光！
今天她的精神好差，經常眼花花脚軟軟咁，整個人無厘神氣，除左瞓，咩都唔想做，連基本的行路，她唔肯行！究竟，係唔係隻藥的副作用真係咁勁？
上網查過呢隻藥，呢隻藥食左就唔可以突間停，但，下次覆診要到下個月尾，如果呢隻藥的side effect咁勁，咁，呢一個多月，她經常都係咁的狀態，咪會唔想做運動，更怎的是，如果她經常都脚軟軟咁，連企都企唔隠，真的好担心她會跌親！
究竟，我地可以點？
XXX is an antiepileptic drug, prescribed to control grand mal seizures (a type of seizure in which the individual experiences a sudden loss of consciousness immediately followed by generalized convulsions) and temporal lobe seizures (a type of seizure caused by disease in the cortex of the temporal [side] lobe of the brain affecting smell, taste, sight, hearing, memory, and movement).
XXX may also be used to prevent and treat seizures occurring during and after neurosurgery (surgery of the brain and spinal cord).
If you have been taking XXX regularly, do not stop abruptly. This may precipitate prolonged or repeated epileptic seizures without any recovery of consciousness between attacks—a condition called status epilepticus that can be fatal if not treated promptly.
Side effects cannot be anticipated. If any develop or change in intensity, inform your doctor as soon as possible. Only your doctor can determine whether it is safe for you to continue taking Dilantin.
今天早上收到醫生的回覆：
1) 他說應該屬於抽筯症,中風的後遺症一種
2) 做左腦掃瞄,結果無顯示是新的中風
3) 腦電圖,需要腦科醫生去睇/研究,等緊結果,需時
4) 抽血, 肝和腎功能都沒事
5) X-ray, 沒有腸塞或腸壞死的問題
6) 開了止抽筯葯,可能是新葯,令她有作嘔的反應,所以給了止嘔葯
7) 今天胃口好點,沒有作嘔的情況,可能已經適應左新葯
8) 但覺得她經常都好無精神,問了她平時會不會這樣,我答經常有這種情況,醫生說應該與之前食的葯無關,因為食開的葯唔會令人瞌眼瞓,不過, 止抽筯葯就會有一點
9) 會睇多一兩日,睇下她對新葯的反應,沒有什麼特別就可以出院
10) 之後會係門診覆診, monitor 她的情況
聽了，安心了，她應該無什麼問題！
下午，dept head話比我聽，我們下半年應該唔使再放no pay leave，佢話佢前幾日已經同我地dept的人講晒，因為我放了假，所以今天話返比我聽，不過，佢話public annoucement未出，所以，佢只同我地dept圍內講！
呢個算係good news，起碼，唔使再八折出糧！
今天表妹call我去睇戲，因為唔知她走得未，所以，我約了睇夜晚，如果走得，就可以接左佢先去睇，如果未得，就探完佢先睇！
等到四點幾都未收到call，便出發去探她，表妹話都去探下她，所以，我們約左係醫院meet！
去到醫院，她表現得好唔舒服，但又講唔到佢有咩事，我聽唔明佢想表達D咩，她又指下呢樣，嗰樣，我搞到一頭霧水，最後，我直接問姑娘她今天怎樣！
姑娘話她今天嘔過，而且，她自己將針口拔走，所以令到隻手好痛！我再追問其他情況，姑娘話可以留低information比醫生，明天call我！
她吃過晚餐後便立刻躺係到，我叫她不要立即睡，她都不理我，隔左一輪，先肯起來刷牙洗臉，之後，又立刻躺返係到！兩個鐘入面，她都好無理精神！我們唯有靜靜咁企係到陪她！
夠鐘要走，我地就出了MK吃dinner，食完先去睇戲，好耐無去睇戲，上次都好似係一月的事了！
想睇呢套都係因為湯漢斯，不過，如果他追查的那一段精彩一點，咁就very good！
今天早上去了做gym，就匆匆回家，和他們吃過lunch之後，就去針灸。家裏開了風扇都好悶熱，但屋企樓下反而比較涼快，因為有風。本來，打算針灸後回家前，和她在樓下行下，散下步，但．．．
針灸完，我們就坐巴士回家，本來都無什麼事，但，巴士行了十多分鐘，突然間她抽搐，都唔知發生咩事，我腦內空白一片，原本打算叫司機停車讓我們先下車，但事情轉變得太快，我叫了司機後，就打了三條九，最後決定係巴士入面等白車到！
在等白車的時候，我們都是幫她搓下心口，希望她呼吸順暢一些。因為我在一個不熟的地方，問司機我地係邊，佢都要望左一輪才可以話我聽我地係邊！
等了一段時間，都未見白車到，反而見到個policeman經過，我就搵了他上車，他再幫我call車，消防車先到，在消防車到來之前，她已經好返D，無再抽搐，而且呼吸都順暢些，消防車的救護員比左D氧氣她，量下呢樣嗰樣，白車就到，交左比白車的救護員，送她上白車！
搞左一輪，要留院觀察，等了好久到差唔多十點都未見到醫生，所以，我們先回家，十一點半過後，才收到醫生的電話，問事發經過，然後說她應該不是再中風，只是中風的後遺症，抽筯，不過，都會幫她做腦電圖和腦掃描，去確定一下是否有第二次中風。
面對突如其來的情況，當時真的有D驚，驚她再中風，驚她有事，雖然係騰晒雞，但總算call左白車，向有關人事講明事件的發生經過同狀況。
今天雖然是放假，但，絕對不比返工舒服，原因係，做了大半天的清潔女工！！！
上星期日，母親節，媽媽走入廚房，以為她想做什麼，她居然拎起塊布，係到抹牆，於是乎，我便幫她抹，就是這樣，我應承她今個星期，幫她清潔廚房。
吃完早餐之後，便開始拆抽油煙機，由買回來到現在，兩年幾來都無拆過出黎洗，所以，預計有千年油蹟，所以，預備了強力清潔劑！
拎住說明書，跟著步驟一步一步咁拆，拆晒出黎就逐件逐件洗，千年油蹟，真的好難洗，所以，都係盡力洗到幾多得幾多，下次，要買過支勁D的清潔劑先得！
洗左兩三個鐘，已經兩點幾，打算和她出去吃lunch，她又唔肯出去，唯有，叫外賣，吃過東西，休息一會，就要裝回抽油煙機，好順利安回所有組件！
搞掂晒，已經四點，出去做gym，夜晚約左朋友去食日本野，呢間都係我地多次幫襯的日本餐廳，野食新鮮但又唔算好貴，所以，想食日本野時，都間中選擇幫襯呢間！
我們點了：炸軟殼蟹卷，三文魚壽司，帶子壽司，活赤貝刺身，蜜桃蟹子沙律，炸蝦天婦羅，什錦刺身及花之戀！食得飽飽的，但，都仍然要去食甜品，今次，去了Haagen Dazs食雪糕，我試了新menu的「杏桃之吻」！然後就好滿足咁回家！！！
今天又係no pay leave，係五月的第一天，每個星期放兩日，返一兩日，放一日咁，日子就好快過！
十點先起來，就出去吃早餐，跟著和她慢慢行返屋企，因未夠鐘出去，所以，我就執下個衣柜，衣服太多，衣柜太小，唯有將冬天衫收起，將夏天放入去，又將一D幾年無著過，或者由大人衫變成小朋友衫的衫（縮左水），拎左去舊衣回收，希望可以騰出一D空位出黎，但執完一輪，都係每個衣框都好full
兩點幾，就出去針灸，去到都未夠三點，但因無人，所以，去到就可以立即開始！
針完就坐巴士回家，每次都會被司機叫我要「踩起」架車才可以推到上巴士，其實我知，我係不能而非不為呀！由平地「踩起」架車，我全無問題，但係斜板上「踩起」，我就有D有心無力，因為我單脚「踩起」架車，單脚係地上時，我會唔夠力，會失重心，所以，每次都係「輪輪盡盡」才可以推到上巴士。
回家前，與她在附近散步，見到其他師奶同她打招呼，不過，她好像不太想理會，自行行去另一個地方坐，行了一小圈，她就要回家了！
咁樣，又過了一天！
今天係四川地震一周年，希望，劫後餘生的人，可以好好生活，幫助重建的人，用心去做，唔好再用一些根本不能起樓的建材黎起樓！
天災，我們未必能躲得過，但人禍，係可以避免的！
今天接到正式的通知，我們下個月15號會係新office辦公，11號要pack晒所有野，12號拆電腦及partition等的東西，15號新office見！
唔知我係咪與搬家有緣，畢業到現在，我只做過四間公司，但，除了第一間公司係我在職其間無搬過之外，其餘三間，我都搬黎搬去，唔通，真係怕我坐係同一個位會悶？
第一間公司，係我離職之後先搬，所以唔關我事！
第二間公司，由一樓搬上樓上，原本可以行樓梯返工，變左一定要搭lift！聽講我離職之後搬左去工業村，要坐shuffle bus先可以返到公司，好彩走得快！
第三間公司，由十樓搬去八樓，再由八樓搬去十五樓，不過聽講現在仲係十五樓，做左兩次苦力！
到現在的公司，我搬的次數就更多更密，又搬office又調位，由1506搬去1502，又由1502搬返去1506，又係1506調位，跟著就搬左黎現在的office，個位坐左一年幾，又要被迫遷，要調位做左「左右門神」，下個月，又要再搬，又要繼續做「左右門神」，而且，又無窗，唉！！！
五月份，原本只有十九個工作天，再加上no pay leave，今個月變左只需要返十三日工，半個月都無。
通常頭嗰5-6個工作天，我都選擇唔放NPL，因為要趕deadline，所以，五月的第一個星期係最辛苦的，因為要返足5 days！
有人問，返足5日係咪好開心呢？我答：唔開心，因為放慣假，一個星期返5日好攰，佢就話，你放假又唔開心，返工又唔開心，究竟你想點？
我想點？好簡單！放假又有人工就最開心．．．
無薪假！真係唔想放囉！！！
七月開始，搬左去新office，租金又平左，希望，放埋六月，七月就唔使再繼續放無薪假
今天係姐姐教會旅行，去方舟公園及馬灣公園，因為我都未去過，所以，就同爸媽跟姐姐一齊去
因為不能跟大隊坐巴士，所以我們自己租了車出發，由家直接到方舟公園，姐姐話這個公園還未向外開放，而家只接受團體申請參觀，我們九點半上車，差唔多十點就到達，等了一陣，十點公園開門，就可以進入公園。
因為沒有地圖供應，所以要拍下指示板上的地圖，方便參觀
首先我們進入「方舟花園」，裏面有好多不同動物的雕像
呢個係整隻的挪亞方舟，因為太長，所以要打斜先可以影晒全相！
之後就進入「方舟多媒體博覽館A」，入面有挪亞方舟的介紹，亦有不同的動物（較小型的動物但是真實的，不是雕像），主要都是教育人類，要愛護大自然，要保護地球等等的訊息，看了3D的「挪亞方舟」的故事，又看了4D「地球」的故事，其實，我唔係好記得呢D劇場的名稱lu，哈哈！！！
行完呢到都十二點幾，因為「方舟生命教育館」下午唔開，所以，我們行埋呢個館先去食lunch！
呢個就係「方舟生命教育館」，入面有5個活動，有彩虹穚，其實係D唔同顏色的木凳到行，有十個點子，跟著點子去做裏面的動作，思考人生！
小朋友在玩「大難淋頭」
小朋友在整「快樂相架」，而我，好似小朋友咁，與媽媽一齊整呢個「快樂相架」，人地係大人教小朋友，而我，就係，阿女教阿媽，哈哈．．．
還有一個叫「最後三十秒」的活動，體驗一下人到最後三十秒，會點呢？
最後玩「救生繩」的活動，蒙住雙眼，沿住救生繩行，體驗如果如到挫折，我們會否搵到「救生繩」，我們會否相信「救生繩」的幫助？
玩完活動，就去食lunch，餐廳有無敵海景view，但食物價錢都好ok，$24一個义燒飯連飲品，而我們，就食左瑤柱蛋白炒飯同乾炒牛河，都係$90，望住個靚海景，簡直係very good lah！
食飽飽，就去最後一個館，「珍愛地球館」，入面有15間展館，但因為不准拍照，所以，我只在入口拍了呢一張！呢個館，是教育性的，小朋友在裏面，可以摸，可以玩，一定會好開心！
以上每個館，都要收費的，所以，唔同價錢的飛可能包含不同的館，今次，我們就一次玩晒所有的館了！
我們再在方舟花園行了一圈，才離開「方舟公園」，出發去「馬灣大自然公園」
「馬灣大自然公園」內，呢個景，好多新人係到影婚紗照
行完平路的公園後，想入去，但有個閘口，打電話去問，個staff話輪椅要係「山上」先入到去，所以，我們出返馬路，兜圈行「上山」，行左一大輪，仲未到，唯有，叫她落車，行樓梯入去，大約十幾級的樓梯，去到一個叫「通識學園」的地方，之後仲有一段樓梯，唉！
終於行到上去，休息一會，再睇下有咩行，原來只有一條路上山，但都係有個閘口，所以，我們打電話叫人開閘，問了個staff，上去要幾耐，佢話幾分鐘，所以，我們就諗住一場黎到，咪推埋上去囉！
先黎一段有成45度斜的斜路，我們要兩個人合力才可以推得上，跟著，我們三個人輪流推上山，才可以上到這個「鳥望台」，出左好多力和汗，哈哈＠＠＠
怱怱影相，就要落去了，因為要趕返去等車，落山比上山易好多，我們一推到馬路，就見到我們租的車，不用推她到原本約左等車的地方，要再推十幾分鐘的路程，好在見到架車，慳返D力，嘻嘻，就可以坐車直接返屋企，玩左成日，好攰！！！！
