覆診二

手術後一個星期就第二次覆診。第一件事就是驗眼，姑娘先用電腦驗眼，然後就叫我遮住左眼，用右眼讀些數字出來，第一二行都ok，第三行就有d讀唔到。

輪到左眼，第一行我已經睇唔到，佢叫我＂斬斬＂眼再試，都係唔得。佢就叫我用遮住隻眼張卡，在好細的孔中，望去d字到，OK，第一行讀到，第二行就有困難，第三行完全唔掂。

 

之後去見醫生，醫生先檢查傷口，話傷口OK，可以減藥。

 

醫生：覺得點呀？

我：夜晚對眼好痕，好多時都會不自覺卒眼，不過戴左眼罩，卒唔到。

醫生：好彩你有戴住，如果唔係就會卒親傷口。可能係d藥令你好痕，今日開次減藥，試下會唔會無咁痕，不過你最好戴多幾日眼罩，無左眼痕先唔戴，會穏陣D。

我：上星期對眼好紅，點解？

醫生：嗰D紅唔緊要的，而家已經散得七七八八，而且嗰度唔係傷口，無問題的。

我：頭先驗眼，我左眼好似好唔清。

醫生：左眼仲有散光，不過第一個星期，度數係會唔穏，遲d就應該OK。下次一個月後黎覆診，再睇睇度數。

我：可唔可以運動，如跳舞或跑步？

醫生：過左一星期應該可以，不過要小心唔好比汗水入眼，或身水身汗要洗頭時有水入眼。

我：咁即係無汗水／水入眼做運動係可以？

醫生：係。
我：可唔可以搽眼部護膚品？
醫生：最好唔好啦，你對眼仲痕，如果加埋對護膚品敏感，就唔係幾好。
我：哦！

 

約了一個月後覆診，而藥方面，類固醇可以減為每日一次，滴多七日就可以停；消炎藥就可以即停，姑娘幫我掉埋，人工淚液就繼續每日四次，用晒去藥房買。

希望，遲D左眼真係會清返，唔想做＂修補手術＂。