改變ED

之前個blog提過會有一個改變，個改變就係，暫別四眼行列！

 

舊年有了做激光矯視的念頭，上網看了資料，聽了兩次講座，一個是聖保羅的，另一個是浸會的。聽完之後，還是十五十六，最後就不了了之。

 

到今年年初，財爺話：「每人派$6000」，我就決定用這筆錢去做手術。雖然係唔夠手術費，但幫補下，總好過無。

 

選擇十月做手術，因為過了夏天，不會再玩水上活動，而十一及十二月，公司會比較忙，不想這段時間請太多的假。

 

再上網看看資料，大部份人都係講兩間眼科中心及名人醫院，去年我聽講座的兩間醫院，都沒有人提及。不過，始於覺得醫院穏陣些，但名人醫院太貴，所以，我就係我聽過講座的兩間醫院中，二擇其一，最後選了浸會，因為近些和朋友comment都覺得佢OK。

 

十月八日去聽多一次講座，講座前會驗眼及量度眼角膜厚度，初步評估適唔適合做激光矯視。然後就由醫生講解什麼是激光矯視，會有些什麼風險等等。其實我已經決定了做，所以都有問一些問題。臨走前，約了十七日去做手術前檢查及二十一日做手術。

 

如果有戴contact lenses，軟性及有散光的，就要停戴兩個星期才可以做手術前檢查，好在我十月沒有戴過，所以可以跟我的計劃約時間檢查。

 

手術前檢查：

 

首先由姑娘電腦驗眼，然後就到量度眼壓。之後就由視光師再準確驗眼，好似平時配眼鏡咁，然後，量度眼角膜厚度及瞳孔的大小，為手術提供準確的數據。

 

在量度眼角膜時，搞左好耐，原因是視光師話我隻眼郁左，原來要hold住隻眼唔郁，望住強光係好難，我整左幾次先OK!

 

之後，就係測試淚水，放了張試紙在眼下面，合埋雙眼，隔一陣，就對比試紙的顏色，我比較眼乾，所以，姑娘話，手術後，眼乾的情況會更為嚴重。

 

最後，就係見醫生，醫生話我一把年紀，好快就會有老花，到時就要帶返老花鏡。醫生話有人會做單眼，可惜，我右眼近視深，左眼散光深，所以，如果做單眼，另一隻眼都係唔清，如果，我散光深轉埋去右眼，我就可以只做右眼。結論係，一係做晒兩隻，一係唔做。

 

見完醫生，又令到我十五十六，不過，我繼續排了二十一日做手術，叫姑娘比一日時間我去考慮，第二天打電話confirm我做定唔做。

 

因為瞳孔放大，睇野唔清楚，所以，坐巴士回家時，要等架巴士埋站，我先知係咪自己要上的車。

 

回家，和家人商量之後，都係決定去做。其實，我應該早幾年去做，會享用多幾年。

 

手術當天：

 

去到醫院，第一批的四位人士已經做完，不過要休息一下才可以離開。坐在我隔離的一位女士，做完之後好似好辛苦咁，她身旁男士問她是不是好痛，她說不是，再問她係咪好唔舒服，她說係。陪我來的姐姐立刻問我，係咪好驚，隔離嗰個好似好辛苦咁。

 

最初我都以為自己會好驚，但，在等待的過程中，又無我估咁驚。

 

我是第二批的最後一個，所以每個步驟我都要等前面兩個做完才到我。首先，視光師幫我再準確驗一次眼，然後就等見醫生，醫生再reconfirm一次，就可以換衫準備做手術。

 

手術有兩部份，第一部份是界開眼角膜，第二部份是打磨。換好衫，姑娘會滴麻醉藥，和解釋入到手術室，要做什麼。

 

躺在手術床，姑娘會問我叫咩名？問做乜手術？邊隻眼？有無藥物敏感？OK才由醫生開始做手術，先由右眼開始，他將一整唔知乜野放入我眼內，他說，你隻眼好細，好難放入去，所以佢左拉右拉，終於將舊野放左入去，之後，又話我眼睫毛長，又要整一整唔好比眼睫毛阻住D激光打入眼內。

 

我只見一些強光和中間一片黑暗，唔知發生乜事，隔一陣，醫生話OK，到左眼，佢就重複整個過程，好快又搞掂，出去等。

 

姑娘再滴麻醉藥，又幫我臉頰消毒，坐係到等第二部份，一來要等前面兩個人先做，二來要等霧化消失一些，才可以做第二部份。

 

臨入手術室，再滴多一次麻醉藥。姑娘問了同樣的問題，才由醫生做手術。先眼四周的地方貼上膠紙，然後望到醫生隻手係眼前郁下郁下，將眼角膜揭開，我要做的，只是望住紅光，初初又一點，慢慢散開了，又慢慢變回一點，什麼也不要理，只要望住紅光就可以了。其間聽到一些打磨的聲，和聞到少少燶味。

 

之後，醫生就用水沖淨，將眼角膜慢慢放回，但有水泡，要重新來過，沖沖水，再放多一次，終於成功。然後到左眼，好快又搞掂。

 

姑娘話，如果無乜野可以換衫，可能我係最後一個，前面兩個人，姑娘係咁同佢地講：你坐5分鐘，無事就可以換衫。

 

換完衫，出面只剩姐姐，沒有其他病人或陪著病人的人。之前的病人都會休息一陣先走，而我，就見埋醫生，就立刻走得。總覺得，佢地趕收工，見我無乜野，約了第二天覆診就話我走得。