四月份的第一天無薪假

今天又是無薪假的開始，但今個月不能好似二月咁，連續放晒，所以，我選了星期二同星期四去放假，可以陪她去針灸。

前兩日醫院打電話黎，話她已經做了六個星期的物理治療，而醫院的病人比較多，所以要改為一星期一次，我都要求姑娘盡量安排繼續一星期兩次，佢好"呼衍"咁話盡量安排！

因為改了一星期一次，今天，也都變成她放假，但因我一早約了人，所以，我都去了買早餐之後，才出門口，趕在lunch時回家，和她一起去吃lunch！

她告訴我她脚痛，我才從家人口中得知，她前兩晚跌親，沒有人知，直至她告訴我們，我們才有人知道她跌親！

於是乎，我就同中醫師講，叫醫師幫她check下有無扭傷，拗柴等等，好彩沒有，但，都拉傷了筯，所以，令她好痛！

也因為如此，我今天都不敢叫她行，大部份都係坐車推她！

針完之後，她說要坐巴士回家，因前兩天家人陪她試過，所以，我又陪她去坐，去到巴士站，不一會就有巴士，是一輛城巴，本來我以為司機會將斜板放到行人路，讓我可以推車上，但見司機無行動，我便叫家人自己放斜板，那時司機才出聲話斜板壞左，心諗，搞錯呀，又唔一早出聲，等我們係到等！

唯有叫她下車行上巴士，得一好心男人幫忙，令她順利上車，她未坐好，司機就開車，我立刻開聲話都未坐好就開車，司機當然並無理我，我唯有快快安頓她坐！呢個司機，真差勁！

回家她仍然叫痛，唯有什麼葯酒，葯油，都幫她查下，又用熱水幫她"呼"下，希望可以舒緩下！

不停提醒她，下次要小心D，要慢慢行，唔好心急，同埋，要叫醒我地事但一個，唔好自己一個人行咁危險！

今天針灸時，遇到另一個男病人，他的女家人不停咁鬧他叫他用力提起隻手，初初以為是兩公婆，我八了一下，男的都比較後生，以為係女人個仔，後來同醫師傾起，才知是兩姐弟，細佬因爆血管而中風，左邊身唔郁得，已經七個月，但奇怪的是，仍然住院，因她在院未夠一個月已經被人“趕”出院，為何他能住七個月？醫師話他左手肌肉萎縮，生硬晒，要慢慢拉返鬆佢，當他工人推他經過我身邊時，我見到，他的左手跟右手大小不一，左手因肌肉萎縮而細很多。

我就用呢個做example，希望鼓勵她繼續做運動及針灸！唔做，就會好似個男人咁，唔郁得架嘞！